อมจฺจราชกญฺญาราชูปชีวิโน ชเน ทิสฺวา เอวํ จิตฺตํ ตสฺส อุปฺปชชฺชติ กินฺนุ โข กถนฺนุ
โข อิเม สํคณฺหิสฺสามีติ เอวเมว โข ตถาคตสฺส ธมฺมํ คมฺภีรํ นิปุณํ ทุทฺทสํ ทุรานุโพธํ
สุขุมํ ทุปฺปฏิเวธิตํ สตฺตานญฺจ อาลยารามตํ สกฺกายทิฏฺฐิยา ทฬฺหสุคหิตตญฺจ ทิสฺวาา กินฺนุ
โข กถนฺนุ โขติ อปฺโปสฺสุกฺกตาย จิตฺตํ นมติ โน ธมฺมเทสนาย สตฺตานํ
ปฏิเวธจินฺตนมานสํเยว ตํ ฯ อปิจ มหาราช ตถาคตานํ ธมฺมตา เอสา ยํ พฺรหฺมุนา
อายาจิตา ธมฺมํ เทเสนฺติ ฯ ตตฺถ ปน กึ การณํ ฯ เตน สมเยน เย มนุสฺสา
ตาปสปริพฺพาชกสมณพฺราหฺมณา สพฺเพ เต พฺรหฺมเทวตา โหนฺติ พฺรหฺมครุกา
พฺรหฺมปรายนา เตน ตสฺส พลวตาย สพฺพญฺญุตญาณสฺส อุตฺตรสฺส สยํ พฺรหฺมสุคตสฺส
โอนาเมน สเทวโก โลโก โอนมิสฺสติ โอกปฺเปสฺสติ อธิมุจฺจิสฺสติ ตสฺมา ตถาคตา พฺรหฺมุนา
อายาจิตา ธมฺมํ เทเสนฺติ ฯ ตตฺถปิ การณํ อุปเทเสสฺสามิ ฯ ยถา มหาราช โกจิ
ราชา วา ราชมตฺโต วา ยสฺส โอนมติ อปจิตํ กโรติ พลวตรสฺส ตสฺส โอนาเมน
อวเสสา ชนตา โอนมติ อปจิตึ กโรติ เอวเมว โข มหาราช พฺรหฺมุนา โอนมิตานํ
ตถาคตานํ สเทวโก โลโก โอนมิสฺสติ ฯ ปูชิตปูชิโต มหาราช โลเกหิ ตสฺมา โส มหาพฺรหฺมา
สพฺเพ ตถาคเต อายาจติ ธมฺมเมสนาย เตน จ การเณน ตถาคตา พฺรหฺมุนา อายาจิตา
ธมฺมํ เทเสนฺตีติ ฯ สาธุ ภนฺเต นาคเสน สุเวทิโต ปญฺโห อติลหุโก ภนฺเต เวยฺยากรโณ
ตถา สมฺปฏิจฺฉามีติ ฯ

ภควโต ธมฺมเทสนาย
อปฺโปสฺสุกฺกภาวปญโห อฏฺฐโม ฯ

ภนฺเต นาคเสน ภาสิตํ เจตํ ภควตา อรหตา สมฺมาสมฺพุทฺเธน
น เม อาจริโย อตฺถิ สทิโส เม น วิชฺชติ
สเทวกสฺมึ โลกมฺสึ นตฺถิ เม ปฏิปุคฺคโลติ ฯ
ปุน จ ตถาคเตน ภณิตํ อิติ โข ภิกฺขเว อาฬาโร กาลาโม เม อาจริโย สมาโน
อนฺเตวาสึ มํ สมานํ อตฺตนา สมสมํ ฐเปสิ โอฬาราย จ มํ ปูชาย ปูเชสีติ ฯ
ยทิ ภนฺเต นาคเสน ตถาคตสฺส อาจริโย อตฺถิ เตนหิ อิติ โข ภิกฺขเว อาฬาโร กาลาโม
อาจริโย เม สมาโน อนฺเตวาสึ มํ สมานํ อตฺตนา สมสมํ ฐเปสีติ ยํ วจนํ ตํ
มิจฺฉา ฯ ยทิ ภควตา ภณิตํ อิติ โข ภิกฺขเว อาฬาโร กาลาโม อาจริโย เม สมาโน

อนฺเตวาสึ มํ สมานํ อตฺตนา สมสมํ ฐเปสึติ เตนหิ น เม อาจริโย อตฺถีติ ตมฺปิ
วจนํ มิจฺฉา ฯ อยมฺปิ อุภโต โกฏิโก ปญฺโห คมฺภีโร ตวานุปฺปตฺโต โส ตยา
นิพฺพาหิตพฺโพติ ฯ
ภาสิตํ เจตํ มหาราช ภควตา
น เม อาจริโย อตฺถิ สทิโส เม น วิชฺชติ
สเทวกสฺมึ โลกสฺมึ นตฺถิ เม ปฏิปุคฺคโลติ ฯ
ปุน ภณิตญฺจ ตถาคเตน อิติ โข ภิกฺขเว อาฬาโร กาลาโม อาจริโย เม สมาโน
อนฺเตวาสึ ม สมานํ อตฺตนา สมสมํ ฐเปสิ โอฬาราย จ มํ ปูชาย ปูเชสีติ ฯ
ตญฺจ ปน วจนํ ปุพฺเพ สมฺโพธาย อนภิสมฺพุทฺธสฺส โพธิสตฺตสฺส สโต อาจริยภาวํ
สนฺธาย ภาสิตํ ฯ ปญฺจเม มหาราช ปุพฺเพ สมฺโพธาย อนภิสมฺพุทฺธสฺส โพธิสตฺตสฺส
สโต อาจริยา เยหิ อนุสิฏฺโฐ โพธิสตฺโต ตตฺถ ทิวสํ วีตินาเมสิ ฯ กตเม ปญฺจ ฯ
เย เต มหาราช อฏฺฐ พฺราหฺมณา ชาตมตฺเต โพธิสตฺเต ลกฺขณานิ ปฏิคฺคณฺหึสุ ฯ
เต ตสฺส โสตฺถึ ปเวทยิตฺวา รกฺขกมฺมํ อกํสุ ฯ เต ตาว ปฐมํ อาจริยา ฯ ปุน
จ ปรํ มหาราช ปิตา ตสฺส สิริสุทฺโธทโน ราชา ยํ เตน สมเยน อภิชาติ อุทิจฺจํ
ชาติวนฺตํ ปทกํ เวยฺยากรณํ ฉฬงฺควนฺตํ สพฺพมิตฺตํ นาม พฺราหฺมณํ อุปเนตฺวา
โสวณฺเน ภิงฺคาเรน อุทกํ โอโนเชตฺวา อทาสิ อิมํ กุมารํ สิกฺขาเปหีติ ฯ อยํ ทุติโย
อาจริโย ฯ ปุน จ ปรํ มหาราช ยา เทวตา โพธิสตฺตํ สํเวเชสิ ยสฺมา วจน สุตฺวา
โพธิสตฺโต สํวิคฺโค อุพฺพิคฺโค ตสฺมึ ขเณ เนกฺขมฺมํ นิกฺขมิตฺวา ปพฺพชิ ฯ อยํ ตติโย
อาจริโย ตํ ปุน จ ปรํ มหาราช อาฬาโร กาลาโม อาจริโย ฯ อยํ จตุตฺโถ
อาจริโย ฯ ปุน จ ปรํ มหาราช อุทโก รามปุตฺโต ฯ อยํ ปญฺจโม อาจริโย ฯ
อิเม โข มหาราช ปุพฺเพ สมฺโพธาย อนภิสมฺพุทฺธสฺส โพธิสตฺตสฺส สโต ปญฺจ อาจริยา
เต ปน ปญฺจ อาจริยา โลกิเย ธมฺเม ฯ อิมสฺมิญฺจ ปน มหาราช โลกุตฺตรธมฺเม
สพฺพญฺญุตญาณปฏิลาภาย นตฺถิ ตถาคตสฺส อนุสาสโก ฯ สยมฺภู มหาราช ตถาคโต
อนาจริยโก ตสฺมา การณา ตถาคเตน ภณิตํ
น เม อาจริโย อตฺถิ สทิโส เม น วิชฺชติ
สเทวกสฺมึ โลกสฺมึ นตฺถิ เม ปฏิปุคฺคโลติ ฯ

สาธุ ภนฺเต นาคเสน เอวเมตํ ตถา สมฺปฏิจฺฉามีติ ฯ

พุทฺธสฺส อาจริยานาจริยปญฺโห นวโม ฯ

ภนฺเต นาคเสน ภาสิตํ เจตํ ภควตา อาสวานํ ขยาย สมโณ โหตีติ ฯ
ปุน จ ภควตา ภณิตํ
จตูหิ ธมฺเมหิ สมงฺคิภูตํ
ตํ เว นรํ สมณมาหุ โลเกติ ฯ
ตตฺรีเม จตฺตาโร ธมฺมา ขนฺติ อปฺปาหารตา รติวิปฺปหานํ อากิญฺจญฺญํ ฯ สพฺพานิปิ
เอตานิ อปริกฺขีณาสวสฺส ปุคฺคลสฺส สกิเลสสฺส โหนฺติ ฯ ยทิ ภนฺเต นาคเสน อาสวานํ
ขยาย สมโณ โหติ เตนหิ
จตูหิ ธมฺเมหิ สมงฺคิภูตํ
ตํ เว นรํ สมณมาหุ โลเกติ ฯ
ยํ วจนํ ตํ มิจฺฉา ฯ ยทิ จตูหิ ธมฺเมหิ สมงฺคีภูโต สมโณ โหติ เตนหิ อาสวานํ
ขยาย สมโณ โหตีติ ตมฺปิ วจนํ มิจฺฉา ฯ อยมฺปิ อุภโต โกฏิโก ปญฺโห ฯ เป ฯ
นิพฺพาหิตพฺโพติ ฯ
ภาสิตํ เจตํ มหาราช ภควตา อาสวานํ ขยาย สมโณ โหตีติ ฯ ภณิตญฺจ
ภควตา
จตูหิ ธมฺเมหิ สมงฺคิภูตํ
ตํ เว นรํ สมณมาหุ โลเกติ ฯ
อยํ มหาราช ตตฺตเกน คุณวิเสเสน ภณิตา ฯ อิทํ ปน นิรวเสสํ วจนํ อาสวานํ
ขยาย สมโณ โหตีติ ฯ อปิจ มหาราช เยเกจิ กิเลสุปสมาย ปฏิปนฺนา เต สพฺเพ
อุปาทายุปาทาย สมโณ ขีณาสโว อคฺคมกฺขายติ ฯ ยถา มหาราช ยา กาจิ ถลชา
ปุปฺผชาติโย วสฺสิกํ ตาสํ อคฺคมกฺขายติ ฯ ยากาจิ อวเสสา ปุปฺผชาติโย ตานิ สพฺพานิ
ปุปฺผานิเยว อุปาทายุปาทาย ชนสฺส ปตฺถิตานิ ปิหิตานิ วสฺสิกานิ ปุปฺผานิ เอวเมว
โข มหาราช เยเกจิ กิเลสุปสมาย ปฏิปนฺนา เต สพฺเพ อุปาทายุปาทาย สมโณ ขีณาสโว